Home / Troje Shqiptare / Kosova / Ja kur do të ndërtohet xhamia në Prishtinë

Ja kur do të ndërtohet xhamia në Prishtinë

Ndërtimit të Xhamisë Qendrore në Prishtinë duket se po i vjen fundi. Stina e pranverës pritet ta bëjë me xhami të re Prishtinën. Kështu kanë konfirmuar zyrtarë në Bashkësinë Islame të Kosovës.

Ahmet Sadriu, zyrtar për informim në BIK, ka bërë të ditur se procedurat për ndërtimin e xhamisë janë në përfundim e sipër, derisa presin përmirësimin e motit që të fillojnë me ndërtimin e saj.

“Po presim me u rregullu moti. Gjithçka është në përfundim e sipër. Procedurat janë në përfundim e sipër dhe presim që në pranverë kismet me fillu ndërtimin”, ka thënë Sadriu.

Mirëpo, kur pyetet se a kanë marrë lejen prej Komunës për ndërtimin e xhamisë, Sadriu përgjithëson duke mos dhënë një përgjigje të prerë.

“Një komision është formu nga kryetari i Komunës dhe komisioni është në përfundim e sipër, informacionet janë që do të përfundojë gjithçka dhe do të fillojmë me ndërtim se boll më u zgjat”, ka deklaruar Ahmet Sadriu.

Indeksonline ka provuar të marrë një përgjigje edhe nga Komuna lidhur me këtë çështje, mirëpo kontakti me ta ka qenë i pamundur. Kujtojmë se në tetor të vitit 2012 ishte vendosur gurthemeli për ndërtimin e xhamisë e cila pritet të jetë godina më e madhe fetare në Prishtinë. Puna me ndërtimin e xhamisë duket të jetë zgjatur shumë.

Ky projekt është dashur të fillonte qysh në tetor të vitit të kaluar. Ndërtimi i kësaj xhamie pritet të kushtojë 20 milionë euro. Ndërsa, prona për ndërtimin e xhamisë është ndarë nga Komuna e Prishtinës.